တရုတ်နှင့် နယ်စပ်ကုန်သွယ်ရေး ကုန်သွယ်မှုစာရင်းဇယားများ ညှိနှိုင်းတောင်းခံမည်

 ယခုအခါနယ်စပ်ဖြတ်ကျော် မှောင်ခိုကုန်သွယ်မှုများများပြားလာရာထိုင်းနိုင်ငံနှင့်ညှိနှိုင်းချက်အရ မြန်မာထိုင်းတရားမ၀င်ကုန်သွယ်မှုမှာ နှစ်စဉ် ဒေါ်လာသန်းတစ်ထောင်ကျော်ကြောင်း၊ထို့ကြောင့် မှောင်ခိုတားဆီးရေးကိုထိရောက်စွာ ဆောင်ရွက်နိုင်ပါကကုန်သွယ်မှုပမာဏ မြင့်မားလာသည့်အပြင် နိုင်ငံတော်အတွက်ထိုက်သင့်သောအခွန်အခများရရှိလာမည်ဖြစ်ပါသည်။ 

 မြန်မာနိုင်ငံသည်တရုတ်နိုင်ငံနှင့်လည်းနယ်စပ်ဖြတ်ကျော်ကုန်သွယ်မှုပမာဏအမြောက်အမြား ဆောင်ရွက်လျက်ရှိရာ မြန်မာတရုတ်ကုန်သွယ်မှုစာရင်းဇယားများကိုကိုက်ညှိခြင်းအားဖြင့်တရားမ၀င်မှောင်ခိုကုန်သွယ်မှုပမာဏနှင့်ကုန်ပစ္စည်းအမျိုးအမည်များကိုသိရှိသုံးသပ်နိုင်မည်ဖြစ်ပါသည်။ယခုအခါကုန်သွယ်ရေးဝန်ကြီးဌာနနှင့် မြန်မာနိုင်ငံ၊ရန်ကုန်မြို့ရှိတရုတ်သံရုံးတို့၏ညှိနှိုင်းချက်အရကုန်သွယ်မှုစာရင်းဇယားများအပြန်အလှန်သတင်းညှိနှိုင်းဖလှယ်ရန်နှင့် နှစ်နိုင်ငံ အကြားကုန်သွယ်မှုမြှင့်တင်ရေးကိစ္စရပ်များကိုတိုးချဲ့ဆောင်ရွက်သွားရန်ချစ်ကြည်ရင်းနှီးစွာဖြင့်ပူးပေါင်းဆောင်ရွက်သွားရန်ရှိကြောင်းသတင်းရရှိပါသည်။

သစ်အလုံးလိုက်တင်ပို့မှုများ ခွင့်မပြုတော့ကြောင်း ကြားသိရ

မြန်မာနိုင်ငံမှသစ်တောထွက်ကုန်များမှာကုန်ချောအဖြစ်တန်ဖိုးမြှင့်ထုတ်လုပ်တင်ပို့ခြင်းထက်အလုံးလိုက်ကုန်ကြမ်းအဖြစ်သာတင်ပို့ခဲ့ကြောင်း၊ထိုသို့တင်ပို့ခြင်းမှာကုန်ကြမ်းအဖြစ်တင် ပို့ခြင်းမှာအကောက်ခွန်နှုန်းထားများစွာသက်သာခြင်းကြောင့် မြန်မာသစ်တင်ပိုသူများကအလွယ် လမ်းကိုလိုက်ခဲ့ခြင်းဖြစ်ကြောင်း၊သို့ရာတွင်သစ်တောများတဖြည်းဖြည်း ပြုန်းတီးနည်းပါး လာခြင်း၊သစ်အချောထည်ပစ္စည်းများထုတ်လုပ်တင်ပို့ခြင်းက ရေရှည်ရပ်တည်နိုင်ရေးအတွက်ပိုမိုအခွင့်အလမ်းသာစေခြင်းများကြောင့်အနာဂတ်တွင်သစ်များကိုအလုံးလိုက်တင်ပို့ခြင်းအား ခွင့်ပြုတော့မည်မဟုတ်ကြောင်းသစ်တောရေးရာဝန်ကြီးဌာနမှအလုပ်ရုံဆွေးနွေးပွဲတစ်ရပ်တွင်  ဆွးနွေးပြောကြားခဲ့ကြောင်းသိရှိရပါသည်။သစ်အလုံးလိုက်တင်ပို့ခြင်းကိုအနာဂတ်တွင် ခွင့်မပြုတော့မည့်အခြေအနေနှင့်ပတ်သက်ပြီးကုန်သွယ်ရေးဝန်ကြီးဌာနသို့ဆက်သွယ်မေးမြန်းခဲ့ရာသစ်တောရေးရာဝန်ကြီးဌာန၏မူဝါဒအတိုင်းပို့ကုန်လိုင်စင်ခွင့်ပြုသွားမည်ဖြစ်ကြောင်း၊ မည်သည့်ခုနှစ်တွင်တင်ပို့ခြင်းကိုရပ်ဆိုင်းမည်ဖြစ်ခြင်းအားတရားဝင်ညှိနှိုင်းဆွေးနွေးခြင်း မရှိသေးကြောင်းသိရသည်။                       

တူနာငါးနှင့် ဆော်လမွန်ငါးများ မြန်မာစားသုံးသူများ သဘောတွေ့နေ

ခေတ်မီတိုးတက်လာသော မြန်မာစားသုံးသူများ၏စားသောက်မှုပုံစံသစ်အရတူနာငါးနှင့် ဆော်လမွန်ငါးများမှာ ဈေးကွက်တွင်ဝယ်ယူစားသုံးသူများပြားလာကြောင်းသိရှိရပါသည်။ ဈေးနှုန်းသင့်လျော်မှုရှိသည့်အပြင်ကျန်းမာရေးနှင့်ညီညွတ်ခြင်းကြောင့်၎င်းငါးများကိုစားသုံးသူများပြားလာသည့်အတွက် ပြည်ပမှဝယ်ယူတင်သွင်းလာကြောင်းသိရှိရပါသည်။ထိုသို့တင်သွင်းရာတွင်လိုအပ်သောကျန်းမာရေးဆိုင်ရာထောက်ခံချက်များနှင့်ပြည့်စုံရန်လိုအပ်ကြောင်း၊သို့မှသာစားသုံးသူများအတွက် ဘေးအန္တရာယ်ကင်းရှင်းမည်ဖြစ်ကြောင်း၊ထို့ကြောင့်ကျန်းမာရေးနှင့်ညီညွတ်ပြီးစားသုံးရန်သင့်လျော်သည့် ထောက်ခံချက်များပါရှိမှသာတင်သွင်းခွင့်ပြုသင့်ကြောင်း ဝေဖန်ပြောကြားမှုများရှိနေသည်ဟုသိရှိရပါသည်။